ചരമവാര്‍ത്തകള്‍

ചവറ: ദേശീയപാതയില്‍ പൊലീസിന്റെ വാഹനപരിശോധന കണ്ട് വെട്ടിത്തിരിച്ച ബൈക്ക് ടൂറിസ്റ്റ് ബസിലിടിച്ചുകയറി ബൈക്ക് യാത്രക്കാരന്‍ മരിച്ചു. തമിഴ്നാട് ചെങ്കോട്ട പുളിയറ പുതൂര്‍ സ്വദേശി സുബ്രഹ്മണ്യം (42) ആണ് മരിച്ചത്. ഇന്നലെ വൈകുന്നേരം ആറോടെ ചവറ കെ.എം.എം.എല്‍ ഗസ്റ്റ്ഹൌസിന് മുമ്പിലാണ് അപകടം. കരുനാഗപ്പള്ളി ഭാഗത്തുനിന്ന് കൊല്ലത്തേക്ക് ബൈക്കില്‍ സഞ്ചരിക്കുകയായിരുന്നു സുബ്രഹ്മണ്യം. ദേശീയപാതയില്‍ ചവറ എസ്.ഐയുടെ വാഹനപരിശോധന കണ്ട് ബൈക്ക് വെട്ടിത്തിരിച്ചപ്പോള്‍ തിരുവനന്തപുരത്തു നിന്ന് ബംഗളൂരുവിലേക്ക് പോയ കര്‍ണാടക സര്‍ക്കാറിന്റെ ടൂറിസ്റ്റ് വോള്‍വോ ബസിടിക്കുകയായിരുന്നു.

ആലപ്പുഴ: വിഷം ഉള്ളില്‍ച്ചെന്ന് വീട്ടമ്മ മരിച്ചു. സംഭവവുമായി ബന്ധപ്പെട്ട് ഭര്‍ത്താവിനെ സൌത്ത് പൊലീസ് അറസ്റ്റുചെയ്തു. വാടക്കല്‍ പനച്ചിക്കല്‍ വീട്ടില്‍ മാര്‍ട്ടിന്റെ ഭാര്യ ടിറ്റിയാണ് (31) മരിച്ചത്. ഭര്‍തൃഗൃഹത്തില്‍വെച്ചാണ് ഇവര്‍ വിഷം കഴിച്ചത്. നിരന്തര ഭര്‍തൃപീഡനത്തെത്തുടര്‍ന്നാണ് ഇവര്‍ ജീവനൊടുക്കിയതെന്ന് പൊലീസ് പറഞ്ഞു. മാര്‍ട്ടിനെ (35) അറസ്റ്റുചെയ്ത് കോടതിയില്‍ ഹാജരാക്കി റിമാന്‍ഡ് ചെയ്തു. വാടക്കല്‍ തന്മയിക്കല്‍ വീട്ടില്‍ അന്നമ്മയുടെ മകളാണ് ടിറ്റി. ചൊവ്വാഴ്ച വൈകുന്നേരം വിഷം ഉള്ളില്‍ച്ചെന്ന ഇവരെ ആലപ്പുഴ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും  രക്ഷിക്കാനായില്ല.