ന്യൂദല്ഹി: വനിതാ ബില്ലിനെതിരായ പ്രതിഷേധത്തെ തുടര്ന്ന് മൂന്നാം ദിവസമായ ഇന്നലെയും ലോക്സഭാ നടപടികള് പൂര്ണമായി തടസ്സപ്പെട്ടു. രാജ്യസഭയില് ബില്ലിനെ എതിര്ത്തു എന്നതിന്റെ പേരില് തങ്ങളുടെ അംഗങ്ങളെ ബലം പ്രയോഗിച്ച് പുറത്താക്കിയ നടപടി തീര്ത്തും ജനാധിപത്യവിരുദ്ധമാണെന്ന് ചൂണ്ടിക്കാട്ടിയായിരുന്നു സഭയില് ഇന്നലെ എസ്.പി, ആര്.ജെ.ഡി, യുനൈറ്റഡ് ജനതാദള് പ്രതിഷേധവുമായി രംഗത്തുവന്നത്. രാവിലെ സഭ ചേര്ന്ന ഉടന് പ്രതിഷേധം ആരംഭിച്ചു. ക്ഷുഭിതരായ എസ്.പി, ആര്.ജെ.ഡി, യുനൈറ്റഡ് ജനതാദള് അംഗങ്ങള് മുലായം സിങ് യാദവ്, ലാലു പ്രസാദ് യാദവ്, ശരദ് യാദവ് എന്നിവരുടെ നേതൃത്വത്തില് സഭാതളത്തിലിറങ്ങി പ്രതിഷേധിച്ചു.
